ئیواره‌ی ژان.....
 
ئه‌زانم به‌دوامدا وێڵی وه‌ك چۆن من بۆ تۆ په‌رۆشم
 
ئێواره‌‌یه‌و شه‌ڕی دوریت به هه‌نسکه‌کانم ده‌فرۆشم
 
شک نابه‌م جگه له پیاڵه‌ی ئه‌م شه‌رابه سپی‌ و تاڵه
 
من پڕم له غه‌م‌ و گریان که‌چی ئه‌ویش هه‌ر به‌تاڵه
 
پێکی مه‌ی و ژانی دڵم وا کێبڕکێی و گره‌ویانه
 
بۆ په‌ستی‌ و مه‌ستی ده‌رونم په‌له‌ و پیشبڕکێیانه
 
باده‌ یادت ده‌بزوێنێ غه‌میش ڕۆحی یه‌خسیر کردووه
 
شریتی خه‌یاڵیش وڕکی دیده‌نی تۆ ی لێم گرتووه
 
وه‌ره‌وه با مه‌ی‌ و ژان‌ و غه‌م به‌ هیوای تازه بگۆڕین
 
هه‌ست و ناخ‌ و ماڵی دڵمان به ئاوی حه‌زمان بشۆرین
 
تا چیتر سێبه‌ری داری چاوه‌ڕوانی ئه‌م که‌ناره
 
بێ چرپه‌و کامی دلداری به‌ڕێ‌نه‌کات یه‌ک ئێواره .
 
به‌کرحه‌بیب